Vuoigatvuohta hohpolaš dikšumii
Vuođđoláhka dorvvasta vuoigatvuođa vealtameahttun birgenláhkái ja áittardeapmái. Áittardemiin dárkkuhuvvo ovdamearkka dihte hohpolaš buohccedikšun. Heahtedilis dus lea nappo vuoigatvuohta beassat dakkaviđe hohpolaš dikšumii lagamus dearvvašvuohtastašuvnna dehe buohcceviesu gohcci vuostáváldimii ruovttugielddastat fuolakeahttá.
Gohcci ovttadaga ovddasvástideaddji lágalažžan dahkkon doavttir, bátnedoavttir dehe sin addin rávvagiid mielde eará lágalažžan dahkkon dearvvašvuohtafuolahusa ámmátolmmoš sáhttá sirdit du dikšuma várás gohcci ovttadahkii, nuppi dearvvašvuohtafuolahusa doaibmaovttadahkii dehe eará vuogálaš dikšunbáikái. Sirdimis galget váldojuvvot vuhtii gohcci ovttadaga hohpolašvuođa klassifiseremat, mat galget doahttaluvvot, sihke ovttahatolbmo dikšundárbbut ja riskka árvvoštallan.
Hohpolaš dikšuma addima várás buresbirgenguovlu galgá ordnet birrajándora gohcima.