Buhtadus olgoriikkain ostojuvvon dálkasiin
Kela buhtte olgoriikkain ostojuvvon dálkasiid goluid. Don sáhtát oažžut buhtadusa iežat olgoriikkain oastin dálkasiin, jos don leat oadjuduvvon buohcama várás Suomas, dus lea ruovttugielda Suomas dehe jos gulat Suoma buohccedikšuma golluovddasvástádusa ollái. Buhtadusa eaktun lea, ahte danveardásaš dálkkas buhttejuvvo Suomas.
Olgoriikkain šaddan dálkkasgolut sáhttet buhttejuvvot maid olbmui, gii ii oro Suomas, muhto gii lea iežas bargama vuođul oadjuduvvon buohcama várás Suomas. Suomas bargi olbmo nuppi EU-riikkas orru bearašlahttu sáhttá maid leat vuoiggalaš buhtadusaide.
EU- dehe Eeg-riikkas, Sveiccas, Stuora-Británnias dehe Davvi-Irlánddas ostojuvvon dálkasat
Jos oasttát Suomas čállojuvvon reseapttain dálkasiid nuppi EU- dehe Eeg-riikkas dehe Sveiccas, mávssát ieš goluid, mat dálkasiin šaddet. Sáhtát ohcat dálkasiin buhtadusaid Kelas maŋálgihtii. Buhtadusa eaktun lea, ahte danveardásaš dálkkas buhttejuvvo Suomas.
Jos oaččut dálkkasdieđalaččat vealtameahttun dikšuma nuppi EU- dehe Eeg-riikkas, Sveiccas, Stuora-Británnias dehe Davvi-Irlánddas gaskaboddasaš orodeamát áigge, oaččut maid dálkasiid eurohpalaš buohccedikšungoarttain seamma ládje go riikkas orrut. Jos don goitge mávssát ieš goluid, mat dálkasiin šaddet, sáhtát ohcat buhtadusa Kelas dehe namuhuvvon riikka buohcanoadjolágádusas.
Jos ozat dálkkasoastimiidda buhtadusaid maŋálgihtii Kelas, sáhtát válljet buhtadusa vuođđun juogo Suoma láhkaásaheami dehe dikšuma addin riikka láhkaásaheami. Juos buohccát fáhkkestaga, buhtadus máksojuvvo álohii dikšuma addin riikka láhkaásaheami mielde.
Jos don leat vásedin ohcalan dikšumii nuppi EU- dehe Eeg-riikii, Sveicii, Stuora-Británniai dehe Davvi-Irlándii almmá Kela mieđihan ovdalobi haga don fertet ieš máksit dálkkasgoluid dievasmearálažžan.
Juos Kela lea mieđihan dutnje EU-ásahusa mieldásaš ovdalobi dikšuma váste, mii addojuvvo nuppi EU- dehe Eeg-riikkas, Sveiccas, Stuora-Británnias dehe Davvi-Irlánddas, don it dábálaččat šatta ieš máksit dálkkasdikšuma goluid, mat addojuvvojit dikšuma olis.
- Jos don liikká mávssát sihke dikšun- ja dálkkasgoluid ieš, Kela buhtte goluin eanemusat dan meari, mii danveardásaš dikšumis livččii šaddan du ruovttugieldda almmolaš dearvvašvuohtafuolahusas.
- Jos dutnje lea mieđihuvvon ovdalohpi ja don leat máksán ieš dušše dálkkasgoluid, buhtadus máksojuvvo buohcanoadjolága vuođul seamma ládje go jos don livččet oastán danveardásaš dálkasiid Suoma apteaikkas.
Eará riikkain ostojuvvon dálkasat
Kela ii buhtte EU- dehe Eeg-riikka, Sveicca, Stuora-Británnia dehe Davvi-Irlándda olggobealde šaddan dálkkasgoluid.