Vuolgime reisui? Ráhkkan mátkái riikaguovdasaš siidduid bakte
3.7.2024
Noahkun lea čoavdda lihkostuvvan mátkái. Oahpásnuva riikaguovdasaš siidduide ja dárkkis ovdamearkka dihte, makkár dearvvašvuohtabálvalusaide leat vuoigadahtton mátkečuozáhagas, sihke gos oaččut veahki, juos buohccát fáhkkestaga mátkki áigge.
Mátkeplánaid dagadettiin dearvvašvuohtagažaldagaid gánnáha maid váldit vuhtii áiggebále. Ovdamearkka dihte eurohpalaš buohccedikšungoartta boahtimis sáhttá mannat máŋga vahku, nu ahte goartta gánnáha diŋgot áiggebále. Ráhkkan reisui nu ahte muittát aŋkke čuovvovaš vuođđoáššiid:
- Dárkkis gávdnogo dus juo eurohpalaš buohccedikšungoarta ja dárbbu mielde diŋgo dan juo áiggebále ovdal mátkái vuolgima.
- Čálit iežat dárbbašan dálkasiid reseapttaid Omakanta (MuKanta) -bálvalusas ja mana lohkame Dálkasat mátkkis -oasi muitinlisttu dálkasiiguin mátkkošteamis.
- Dárkkis man du mátkedáhkádus gokčá – eurohpalaš buohccedikšungoarta ii buhtte dáhkádusa.
- Čielggat báikkálaš heahtenummára ja furke dan iežat telefovdnii – báikkálaš heahtenummárat gávnnat riikkaguovdasaš siidduin.
Riikaguovdasaš siidduin gávnnat luohtehahtti dieđu sierra riikkaid dearvvašvuohtafuolahusa bálvalusain, dikšumii gullevaš rivttiin ja vejolaš goasttádusain. Dearvvašvuohtačuolmmat eai geahča áiggi dehe báikki ja danin lea dehálaš čielggadit ovddalgihtii, mot ja gos oaččut čuozáhatriikkas dearvvašvuohtadikšuma. Maiddái geavadat ja goasttádusat sáhttet molsašuddat mearkkašahtti ládje sierra riikkaid gaskka ja danin ávžžuhit oahpásnuvvat aiddo iežat mátkečuozáhaga riikagovvádussii.
Bistevaš ovdánahttinbargu buktá mielddistis maid nuppástusaid
Rájiid rasttildeaddji dearvvašvuohtafuolahusa kontáktačuoggá bargu lea bajásdoallat ja ovdánahttit EU-dearvvasvuodadiksun.fi -siidduid. Mii háliidit sihkkarastit, ahte fállat álohii luohtehahtti ja áigedássásaš dieđu. Danin dárkkistit ja beaivádit maid riikagovvádusaid dieđuid jeavddalaččat.
Ođđa beaivádanjorus buvttii mielddistis maid veaháš stuorit nuppástusa: mii leat sihkkon EU- ja Eeg-guovllu olggobeale riikkaid riikagovvádusaid earret muhtin spiehkastaga. Mearrádusa duogábealde lea viiddit fierbmebálvalusa ovdánahttinbargu, muhto maiddái luohtehahtti dieđu oažžuma váttisvuohta.
Juos ozat dieđu riikkas, mii ii šat gávdno riikaguovdasaš siidduineamet, ávžžuhit oahpásnuvvat aŋkke olgoriikkaministeriija mátkkoštandieđáhusaide sihke DBL mátkkošteaddji dearvvašvuohtaofelažžii.
- Olgoriikkaministeriija mátkkoštandieđáhusat (um.fi) (suomagillii)
- Mátkkošteaddji dearvvašvuohtaofelaš (thl.fi) (suomagillii)
Oahpásnuva riikaguovdasaš siidduid lassin maid muitinlisttuide ja diehtobáhkaide, mat gávdnojit min siidduin.
Go ráhkkanat mátkái áiggebále, de sáhtát deaivat ođđa fearaniid sihkarvuođain ja movttain!