Mot rájiid rasttildeaddji dearvvašvuohtafuolahusa kontáktačuokkis ovdánahttá olgoriikkaide dikšuma várás ohcaleddjiid bálvalusaid?

Olgoriikkaide dikšuma várás ohcalemiin dárkkuhuvvo dat, ahte olgoriikkaide mátkkoštuvvo vásedin oažžut buohccedikšuma. Fáhkka buohccámat dehe dáhpedorpmit ovdamearkka dihte luopmomátkki áigge eai leat dikšuma várás ohcaleamit. Olgoriikkaide sáhttá ohcalit dikšuma várás iešoaivválaččat almmá ovdalobi haga dehe bivdit dikšuma várás ohcaleami ovdalobi Kelas.

Min diehtočoaggima ulbmilin lei čilget earret eará man dihte áššehasat ohcalit olgoriikkaide dikšuma várás ja mot mii sáhttit kontáktačuoggás buoremusat veahkehit sin dán proseassas. Álggaheimmet dieđu čoaggima nu ahte čohkket oktii kontáktačuoggás áššehasdiehtu, mii lea juo leame, earret eará fierbmesiidduid galledeaddjedieđuid, áššehasbálvalusa statistihkaid sihke sosiálalaš media analytihka bakte. Hábmiimet dieđuid vuođul, mat leat leame, mihtilmasamus geavaheaddjeprofiillaid.

”Dieđu čoaggin, mii juo lea leame, doaibmá buorrin álggahussan, daningo dat boktalii oba bargojoavkku smiehttat mii dieđuid ja ipmárdusaid midjiide lea juo čoggon olgoriikkaide dikšuma várás ohcaleddjiin”, muitala kontáktačuoggá áššedovdi Mira Rantakeisu.

Áššedovdibargobájiin guorahallojuvvoje áššehasprofiillat ja áššehasbálgát

Jotkkiimet diehtočoaggima áššedovdibargobájiin, main suokkardallat makkárat leat mihtilmas dikšuma várás ohcaleaddjit ja dilit, main dikšuma várás ohcaluvvo olgoriikkaide. Daid vuođul identifiseriimet áššehasaid diehtodárbbuid, muosáhan hástalusaid ja bálvalandárbbuid. Min identifiseren áššehasprofiillat ledje hoahpuhis dikšuma várás ohcaleaddjit, spesiálabuohccedikšuma ohcaleaddjit sihke áššehasat, main lei juo ovddit dikšungaskavuohta olgoriikkaide. Spesiálabuohccedikšuma várás ohcaleddjiid joavkkus ledje maid hohpolaččat olgoriikkaide dikšuma várás ohcaleaddjit.

Ákkat olgoriikkaide dikšuma várás ohcaleapmái ledje earret eará ovddit oktavuohta olgoriikkaide dehe čuolmmat dikšuma várás beassamis Suomas. Maiddái dikšuma hálbbit haddi olgoriikkain ja dikšuma kvaliteahttakritearat ledje geassinfápmudahkkin olgoriikkaide dikšuma várás ohcaleamis.

Dikšuma ohcaleami čuolmmat identifiserejuvvoje golmma sierra muttus: čielggadanmuttus, dikšuma oažžumis sihke buhtadusaid ohcamis. Čielggadanmuttu hástalussan identifiserejuvvoje ovdamearkka dihte diehtováili ja dieđu ipmirdeapmi, eahpesihkarvuohta buhttejuvvogo dikšun sihke das, man muttus ovdalohpi galggalii ohccojuvvot. Dikšuma várás ohcaleddjiin sáhttet leat maid buozalmasat, mat sáhttet váttásnuhttit áššiid čielggadeami.

Bargobájiin vuođđu diehtočoaggima čuovvovaš lávkkiide

Guorahalaimet bargobájiin maid prelimináralaččat vugiid dasa, mot sáhtáleimmet kontáktačuoggás veahkehit áššehasa buoremus vejolaš vuogi mielde dikšuma várás ohcaleamis. Kommunikašuvnnas lea guovddášrolla áššehasaideamet joksamis, sorjákeahttá das, manin olmmoš ohcala dikšuma várás olgoriikkaide. Lea dehálaš, ahte mii leat mielde áššehasaide dárbbašlaš kanálain, dego sosiálalaš medias ja ohcanmášenozuin. Áššehasaide čuozihuvvon diehtu galgá leat čielggas ja bálvalanbálggis galgá leat nu vuoiggus ja beaktil go vejolaš. Kontáktačuokkis sáhttá doaibmat kompássan áššehasaide ja oahpistit sin lassidieđu ohcamii ovdamearkka dihte eará EU- ja Eeg-riikkaid kontáktačuoggáin.

Oaččuimet bargobájiin buori vuođu áššehasipmárdusbargui ja diehtočoaggimii. Áššeráiddu čuovvovaš oasis muitalit, makkár eará vugiid mielde čokkiimet dieđu olgoriikkaide dikšuma várás ohcaleddjiin.