Kela: Suoma ja Estteeatnama gaskasaš soahpamuš álbmotdieđuid lonohallamis sáhttá váikkuhit dikšunriektái Suomas

Suopma ja Estteeanan leaba vuolláičállán ođđa soahpamuša álbmoga registreremis ja álbmotdieđuid elektrovnnalaš lonohallamis. Ođđa soahpamuša mielde olmmoš ii sáhte báhcit fásta orrunbáikki haga. Fásta čujuhus ii goitge sáhte šat registrerejuvvot oktanaga goappánai riikii, muhto olbmo ruovttugielda sáhttá boahttevuođas leat juogo Suomas dehe Estteeatnamis.  

Soahpamuš ja dasa gullevaš láhkaásaheami rievdadusat bohte vuoibmái 1.5.2024. Suomas dieđuid lonohallama ovddasvástádus lea Digi- ja álbmotdiehtovirgedoaimmahagas (DVV). DVV lea dieđihan áššis iežas fierbmesiidduin (dvv.fi) (suomagillii).

Riekti almmolaš dearvvašvuohtafuolahussii vuođđuduvvá ruovttugildii

Juos olbmo ruovttugielda lea Suomas, son oažžu dikšuma Suoma almmolaš dearvvašvuohtafuolahusas ja máksá dikšumis gieldaguovdasaš áššehasmávssu. Vaikko olbmo ruovttugielda livččii Estteeatnamis, de sus sáhttá lihkká leat riekti oažžut dikšuma Suoma almmolaš dearvvašvuohtafuolahusas.  

Rievtti buohccedikšumii sáhttá čielggadit Kelas. Kela ii dárkkis dieđuid automáhtalaččat, muhto dikšunrievtti ferte ohcat ieš.

Dikšunrievtti sáhttá ohcat olmmoš, geas lea ruovttugielda Estteeatnamis ja gii

• bargá Suomas
• bargá sihke Suomas ja Estteeatnamis ja lea ožžon Ealáhatdorvoguovddáža mieđihan A1-duođaštusa
• stuđere Estteeatnamis ja lea oadjuduvvon buohcama várás Suomas
• lea ealáhagas ja ožžu ealáhaga dušše Suomas.

Juos eavttut ollahuvvet, Kela mieđiha duođaštusa rievttis dikšunovdduide Suomas. Duođaštusain olmmoš sáhttá čujuhit, ahte sus lea riekti oažžut almmolaš dearvvašvuohtafuolahusa bálvalusaid áššehasmávssu hattiin.

Ovdamearkkat diliin, main sáhttá ohcat dikšunrievtti  

Suomas bargi Alice

Estteeatnanlaš Alice bargá Suomas. Alice orru eanas Estteeatnamis, ja son lea válljen doallat iežas ruovttugieldda Estteeatnamis. Suomas bargama dihte Alices lea riekti Suoma almmolaš dearvvašvuohtafuolahusa bálvalusaide. Daningo Alices ii leat ruovttugielda Suomas, de son galgá ohcat Kelas dikšunrievtti. Alicei mieđihuvvo duođaštus rievttis dikšunovdduide Suomas. Go son čájeha dan, de son oažžu almmolaš buohccedikšuma Suomas seamma haddái go dat, geain lea ruovttugielda Suomas.

Goappašiin riikkain bargi Reino

Reinos lea orrunviessu sihke Suomas ja Estteeatnamis, daningo son bargá goappašiin riikkain. Ealáhatdorvoguovddáš lea mieđihan Reinoi A1-duođaštusa. Reinos lea leamaš ruovttugielda Suomas ja Estteeatnamis, muhto dál son registrere iežas fásta čujuhusa Estteeatnamii. Juos Reino háliida geavahit Suoma almmolaš dearvvašvuohtafuolahusa bálvalusaid áššehasmávssu hattiin, son galgá ohcat Kelas dikšunrievtti. Reinoi mieđihuvvo duođaštus rievttis dikšunovdduide Suomas. Dan čájehemiin son oažžu Suomas almmolaš buohccedikšuma seamma haddái go dat, geain lea ruovttugielda Suomas.

Estteeatnamis stuđerejeaddji Pentti, gii lea oadjuduvvon stuđeremis áigge Suomas  

Pentti stuđere 5 jagi guhkkosaš dutkosa Estteeatnamis. Son lea oadjuduvvon buohcama várás Suomas Estteeatnamis stuđerema áigge. Pentti mearrida registreret iežas fásta čujuhusa Estteeatnamii. Penttis lea ain riekti Suoma almmolaš dearvvašvuohtafuolahusa bálvalusaide. Juos son Suomas manadettiinis háliida geavahit almmolaš buohccedikšuma bálvalusaid, son galgá ohcat Kelas dikšunrievtti. Sutnje mieđihuvvo duođaštus rievttis dikšunovdduide Suomas. Dan čájehemiin son oažžu Suomas almmolaš buohccedikšuma seamma haddái go dat, geain lea ruovttugielda Suomas.

Ealáhatolmmoš Marja, gii oažžu ealáhaga dušše Suomas  

Marja lea mearridan muotkut ealáhahkii bázedettiin Estteeatnamii ja registreret maid iežas fásta čujuhusa Estteeatnamii. Son oažžu ealáhaga dušše Suomas, ja ealáhaga máksima geažil Suomas lea ovddasvástádus su buohccedikšuma goluin. Go Marja muotku Estteeatnamii, de Kela addá sutnje mearrádusa dikšunrievttis ja mieđiha sutnje eurohpalaš buohccedikšungoartta, man jorggubealli lea limeruoná. Dákkár goarttain Marja Suomas manadettiinis ožžu almmolaš buohccedikšuma bálvalusaid seamma haddái go dat, geain lea ruovttugielda Suomas.

Loga lasi:

• Buohccedikšun Suomas (kela.fi) (suomagillii)
• Ná ozat dikšunrievtti (kela.fi) (suomagillii)

Gáldu: Kela.fi (suomagillii)