Kela: Olgoriikkas ožžojuvvon buohccedivššus sáhttá dál oažžut stuorát buhtadusa go ovdal

Ovdalohpi direktiivva mielde ii ođđasis spiehkastettiin váldojuvvo atnui 2024 rájes, daningo dearvvašvuohtafuolahusa bálvalusválljahupmái eai dálá áigge gula dakkár doaibmabijut, mat deavddále dan gáibádusaid. Lassidieđut Kela dieđáhusas.

Áššehas sáhttá ohcalit buohccedikšui nuppi EU- dahje Eta-riikii, Sveicii, Stuorra-Británniai dahje Davvi-Irlándii ja oažžut Kelas buhtadusa divššu goluin. Dikšui sáhttá ohcalit iešoaivválaččat dahje bivdit dikšui ohcaleami várás lobi ovddalgihtii Kelas.

Láhka rájáid rasttildeaddji dearvvašvuođafuolahusas rievddai 1.5.2023. Boahttevuođas Kela buhtada iešoaivválaš dikšui ohcaleami goluid eanemustá dan veardde, maid sullasaš dikšu livčče máksán áššehasa iežas buresveadjinguovllus Suomas. Kela jearrá dárbbašlaš dieđuid áššehasa buresveadjinguovllu dearvvašvuođafuolahusas. Muhtun diliin nuppástus sáhttá oaivvildit dan, ahte Kela máksá áššeháššii stuorát buhtadusa go ovdal. Nuppástusat bohte fápmui máhccevaččat 1.1.2023 rájes, de buhtadusa sáhttá ohcat dain goluin, mat leat boahtán 1.1.2023 dahje dan maŋŋá.

Dikšu galgá vástidit divššu, man oažžu Suomas

Go áššehas ohcala iešoaivválaččat dikšui nuppi EU- dahje Eta-riikii, Sveicii, Stuorra-Británniai dahje Davvi-Irlándii, son ferte ohcat heivvolaš dikšobáikki ieš ja čielggadit, sáhttágo oažžut doppe divššu.

Buhtadusa eaktun lea, ahte dikšu lea árvvoštallojuvvon medisiinnalaččat dárbbašlažžan. Dikšu galgá maiddái vástidit divššu, man áššehas livčče ožžon Suoma almmolaš dearvvašvuođafuolahusas. Lassin dikšui dárbbašuvvo doaktára sátta, jos sátta dárbbašuvvošii sullasaš dikšui Suomas.

Áššehas ferte máksit buot dikšogoluid vuos ieš ja ohcat buhtadusa maŋŋegihtii 6 mánotbaji siste das, go son lea máksán divššu.

Buhtadus ohccojuvvo skoviin Ulkomailla syntyneet sairaanhoitokustannukset – Olgoriikkas šaddan buohccedikšungolut SV128 (pdf, suomagillii).

Áššehas sáhttá bivdit dieđu buhtadusa mearis ovddalgihtii

Áššehas sáhttá bivdit Kelas ovddalgihtii dieđu, oažžugo son olgoriikkas addojuvvon divššus buhtadusa ja mii lea buhtadusa mearri. Dát diehtu gohčoduvvo ovddalgihtiialmmuheapmin. Kela máksá buhtadusa vugiin, man lea almmuhusas muitalan, jos dikšu lea ollašuvvan dieđuid vuođul, maid áššehas ohcamušastis lea addán.

Ovddalgihtiialmmuheapmi ohccojuvvo skoviin Hakemus – Ennakkoilmoitus ulkomailla annettavan sairaanhoidon korvauksesta (kela.fi, suomagillii).

Jagi 2024 álggu rájes buhtadusa oažžun sáhttá eaktudit lobi oažžuma ovddalgihtii

Láhkanuppástusa čuovvumuššan jagi 2024 álggus váldojuvvo geavahussii ođđa ovddalgihtiilohpi, mii lea pasieanttadirektiivva mielde.

Muhtun diliin ovddalgihtiilohpi lea eaktun dasa, ahte Kela sáhttá máksit áššeháššii buhtadusa divššus, man son lea ožžon olgoriikkas. Ovddalgihtiilohpi boahtá leat bákkolaš ovdamearkan dalle, jos dikšui gullá erenomáš riska ja dat eaktuda idjadeami buohcceviesus.

Loga lasi

Hoitoon hakeutuminen ulkomaille – Dikšui ohcaleapmi olgoriikii (kela.fi, suomagillii)

Kela