Kela: Olgoriikkain ožžojuvvon buohccedikšuma goluid buhtten rievdá
14.2.2023
Dás maŋás Kela (Áel) buhtte iešoaivválaš dikšumii ohcaleami goluid eanemusat dan meare, maid danveardásaš dikšun livččii máksán áššehasa iežas buresbirgenguovllus (buresveadjinguovllus) Suomas. Buhtadusa sáhttá oažžut buohccedikšuma goasttádusain, mat leat šaddan EU- dehe Eeg-riikkas, Šveiccas, Stuora-Británnias dehe Davvi-Irlánddas. Nuppástusat bohtet vuoibmái máhccevaččat 1.1.2023 rájes.
Riikkabeaivvit lea dohkkehan rievdadusaid láhkii rájiid rasttildeaddji dearvvašvuođa fuolahusas. Rievdadusat váikkuhit buhtadusaide, maid Kela máksá iešoaivválaš dikšuma várás ohcaleamis EU- dehe Eeg-riikii, Sveicii, Stuora-Británniai dehe Davvi-Irlándii.
Dikšuma várás sáhttá ohcalit iešoaivválaččat dehe ovdalobiin. Ovdal Kela lea buhtten iešoaivválaš dikšuma várás ohcaleami goluid seamma prinsihpaid mielde go Suomas ožžojuvvon priváhta buohccedikšuma goluid.
Dás maŋás Kela buhtte goluid eanemusat dan meare, maid danveardásaš dikšun livččii máksán áššehasa iežas buresbirgenguovllus. Muhtin diliin nuppástus sáhttá dárkkuhit dan, ahte Kela máksá áššehassii ovdalačča stuorit buhtadusa. Áššehas galgá goitge álohii máksit áššehasmávssu, man Suoma almmolaš dearvvašvuođa fuolahus livččii bearran dikšumis.
Go áššehas ohcala iešoaivválaččat olgoriikkaide dikšuma várás, de son galgá vuohččan máksit visot goluid ieš ja ohcat maŋálgihtii buhtadusa Kelas.
Kela ii buhtte buohccedikšuma goluid, mat leat šaddan eará báikkis go EU- dehe Eeg-riikkas, Šveiccas, Stuora-Británnias dehe Davvi-Irlánddas.
Dikšun galgá leat ovttaveardásaš Suomas addojuvvon dikšumiin
Áššehas sáhttá oažžut Kelas buhtadusa dikšumis, mas dikšun árvvoštallojuvvo dálkkasdieđalaččat dárbbatlažžan ja juos dikšun gullá Suomas almmolaš dearvvašvuođa fuolahusa bálvalanválljahupmái. Dasa lassin dat galgá leat danveardásaš dikšumiin, man áššehas oččolii Suoma almmolaš dearvvašvuođa fuolahusas.
Juos gažaldatvuloš dikšun gáibida Suomas sáddenbáhpira, áššehas dárbbaha sáddenbáhpira maid ohcalettiin dikšuma várás olgoriikkaide.
Kela bivdá buresbirgenguovllus árvvoštallama, ollahuvvetgo eavttut buhtadusa oažžumii.
Áššehas sáhttá bivdit Kelas ovddalgihtii dieđu buhtadusas
Dás maŋás áššehas sáhttá bivdit Kelas ovddalgihtii dieđu, oažžugo son buhtadusa dikšumis, mii addojuvvo olgoriikkain, ja mii lea buhtadusa meriid. Kela máksá buhtadusa ovddalgihtii iežas muitalan vuogi mielde, juos dikšun lea ollahuvvan áššehasa ovdailmmuhusa mielde.
Láhka rájiid rasttildeaddji dearvvašvuođa fuolahusas ja nuppástusat dikšuma buhttemii bohtet vuoibmái máhccevaččat 1.1.2023. Presideanta galgá goitge vel váfistit lága. Easka dan maŋŋel Kela sáhttá čielggadišgoahtit ovdailmmuhusa vuođul, leago áššehasas riekti buhtadussii.
Dikšuma buhtten sáhttá dás maŋás gáibidit ovdalobi
Láhkarievdadusaid čuovvumuššan jagi 2024 álggus váldojuvvo atnui ođđa ovdalohpi buohccedirektiivva mielde.
Muhtin diliin ovdalohpi lea eaktu dasa, ahte Kela sáhttá máksit áššehassii buhtadusa olgoriikkain ožžojuvvon dikšumis. Ovdalohpi boahtá leat bákkolaš ovdamearkka dihte dalle, juos dikšumii laktása earenoamáš riska ja dat gáibida idjadeami buohcceviesus. Suoma ráđđehus mearrida sierra ásahusain daid bálvalusaid, maid goluid buhtten gáibida ovdalobi.
Jagi 2022 Kela buhttii olgoriikkain addojuvvon dikšuma goluid oktiibuot 2,6 mil. euro. Iešoaivválaš dikšumii ohcaleamis EU- dehe Eeg-riikii dehe Sveicii máksojuvvoje buhtadusat 210 000 euro.