EU-dearvvasvuodadiksun.fi-siidduid sisdoalut ođasnuvvet muttuid mielde

Rájiid rasttildeaddji dearvvašvuohtafuolahusa kontáktačuokkis fállá fierbmebálvalusainis dieđu dearvvašvuođa bálvalusain ja vuoigatvuođas dearvvašvuohtafuolahussii olgoriikkaide muotkuide, Supmii olgoriikkain boahttiide, olgoriikkaide dikšuma várás vuolgiide sihke mátkkošteddjiide.

EU-dearvvasvuodadiksun.fi-fierbmesiiddut lea leamaš doaibmame juo jagi 2015 rájes, duohta gal álggos eará namain, ja siidduide lea jagiid áigge čoggon olu diehtu dearvvašvuohtafuolahusa máŋgga sierra oassesuorggis. Kontáktačuokkis lea ođasmahttán sisdoaluid jágiid áigge unna oasážiid mielde.

Dárbu EU-dearvvasvuodadiksun.fi-fierbmesiidduid sisdoaluid ođasmahttimii badjánii sihke geavaheddjiid máhcahagas ja kontáktačuoggá áššedovdiid fuomášumiin, kontáktačuoggá fierbmekommunikašuvnna áššedovdi Silja Aunola muitala.

Fierbmesiidduid geavaheapmi obanassiige lea earáhuvvan jagiid áigge ja dálá siidduid ráhkadus sihke sisdoallosiidduid stuora mearri ii Aunola mielde bálval geavaheddjiid, geat leat hárjánan geahčadit dieđu ja navigeret fierbmemáilmmis mobiilarusttegiiguin.

“Gávnnaheimmet, ahte sisdoalut eai dávis dálá áigge dáláš dárbbuide, go fierbmesiidduid geavaheami dábit leat nuppástuvvan”, Aunola dadjá.

”Ovdamearkka dihte min áššehasbálvalussii bohtet gaskkohagaid gažaldagat, maidda gávdnolii vástádus siidduineamet, juos dan máhtálii ohcat. Siidduid ráhkadus ii goitge leat álkimusaid geažis ja muhtimin ohccojuvvon dieđu lea váttis gávdnat. Fierbmesiiddut leat áiggistis huksejuvvon dihtorgeavaheaddji oaidninvuogis, muhto jagiid mielde mobiilarusttegiid geavaheddjiid joavku lea laskan sakkarat. Dán nuppástussii geahččalit siidduid ovdánahttimiin dávistit.”

Čoggojuvvon diehtu ja máhcahagat doarjjan ođasmahttimis

Rájiid rasttildeaddji dearvvašvuohtafuolahusa kontáktačuokkis álggahii jagi 2023 áššehasipmárdusbarggu, man ulbmilin lea čoaggit dieđu kontáktačuoggá eará áššehasjoavkkuin. Áššehasipmárdusbarggus čoggojuvvon diehtu adnojuvvo ávkin EU-dearvvasvuodadiksun.fi-fierbmesiidduid ovdánahttimis ja sisdoaluid ođasmahttimis.

Kontáktačuokkis buktá vuohččan siidduide ođđa sisdoalu ovdanbuktinvugiid, mat váldojuvvojit unnánaččaid atnui sierra sisdoalloollisvuođain, go oasit gieđahallojuvvojit, čavduduvvojit dehe čállojuvvojit ođđasit.

”Dán sisdoalu ođasteapmái gullet máŋga oasáža. Mis leat boahtán juo teknihkalaš ođastusat, maiguin sisdoaluid oažžu visuálalaččabun ja dađi lági mielde sávvamis álkibut ipmirdahttin”, Aunola dadjá.

Sisdoaluid ođastus váldá áiggi. EU-dearvvasvuodadiksun.fi-fierbmesiidduin lea olu diehtu, mii lea juhkkojuvvon iežas vuollesiidduide. Kontáktačuoggá ulbmilin lea čavdudit sisdoaluid ja ovttastahttit vuollesiidduid, vai diehtu livččii álkibut geahčadahtti ja dat gávdnolii jođáneappot. Dasa lassin ovdamearkadáhpáhusat buktojuvvojit áššiid čilgema doarjjan.

Kontáktačuokkis áigu čuozihit návccaid čavdudanbarggu álggus earenoamážit dávjá jerrojuvvon gažaldagaide. Gažaldatásaheami bakte lea álki muitalit váttes áššisnai váldočuoggáid, ja fierbmesiidduid geavaheaddji sáhttá liŋkka bakte oahpistit lohkat lassidieđu sisdoallosiidduin.

”Dávjá jerrojuvvon gažaldagaide čoggojuvvojit gažaldagat áššehasbálvalusas. Dasa lassin ovdamearkka dihte go ođđa láhkarievdadusat bohtet, de gažaldagat nohkkojuvvojit ja rievdadusain ráhkaduvvojit oanehis diehtočaskosat dávjá jerrojuvvon gažaldagaid siidduide”, Aunola muitala.

Áššehasbálvalus fierbmesiidduid geavaheaddji doarjjan

Muhtin rájiid rasttildeaddji dearvvašvuohtafuolahusa áššit leat mohkkát, iige daid leat álohii álki ipmirdit. Sisdoalut viggojuvvojit čavduduvvot ja čielggasmahttojuvvot, muhto buot ii sáhte ovttageardánahttojuvvot áššiid mohkkáivuođa dihte.

”Dán dihte mis lea áššehasbálvalus fierbmesiidduid gallededdjiis doarjjan. Áššehasbálvalussii sáhttá sáddet gažaldagaid šleađgaboasttain, juos muhtin ášši báhcá smiehtahit.”

Sáhtát maid guođđit gažaldaga oktavuohtaváldinskoviin!