Dieđu juohkin, ovttasbargu ja ovdánahttin: EU-dearvvasvuođadiksun.fi-fierbmebálvalusa ođđa doaibmagoddi čoahkkanii
6.5.2024
Rájiid rasttildeaddji dearvvašvuohtafuolahusa kontáktačuokkis ovdánahttá EU-dearvvasvuodadiksun.fi-fierbmebálvalusa duojásii áššehasaideaset váste. Ođđaseamos rievdadussan lea fierbmebálvalusa doaibmagoddi – arena ovdánahttimii, čanusjoavkobargui ja dieđu juohkimii.
Rájiid rasttildeaddji dearvvašvuohtafuolahusa kontáktačuoggá fierbmebálvalus EU-dearvvasvuodadiksun.fi lea ollahuhtton ovttasráđiid sosiála- ja dearvvašvuohtaministeriijain, Dearvvašvuođa ja buresbirgema lágádusain ja Álbmotealáhuslágádus Kelain.
Ovttasbargan guimmiiguin šattai konkrehtalažžan, go EU-dearvvasvuodadiksun.fi-fierbmebálvalusa ođđa doaibmagoddi čoahkkanii 17.4.2024 Kela váldodoaibmasajiin Helssegis sihke gáiddusoktavuođaid bakte.
Ođđa doaibmagotti barggut vuođđuduvvet láhkaásaheapmái, dárkileappot miessemánus 2023 vuoibmái boahtán láhkii rájiid rasttildeaddji dearvvašvuohtafuolahusas. Lága mielde doaibmagotti bargun lea plánet fierbmebálvalusa sisdoalu ja funktionálavuođaid ovdánahttima sihke sihkkarastit dieđu ovttalágánvuođa ja áššehasaid dárbbuid ja sávaldagaid vuhtii váldima.
Kontáktačuokkis oaidná doaibmagotti divrrasin maid čanusjoavkobargama ja ovttasbarggu dihte: doaibmagottis seamma fáttá olis bargit oahpásnuvvet guhtet guimmiidáset, sáhttet juohkit buriid geavadiid ja atnit ávkki nuppiideaset máhtus.
Dieđu ja máhtu juohkin
Ođđa doaibmagotti ulbmilin lea ovdánahttit EU-dearvvasvuodadiksun.fi-fierbmebálvalusa. Rájiid rasttildeaddji dearvvašvuohtafuolahusa kontáktačuokkis bovdii doaibmagoddái ovddasteddjiid Kelas, Dearvvašvuođa ja buresbirgema lágádusas, sosiála- ja dearvvašvuohtaministeriijas, HUSis, Fimeas, Kanta- (Vuođđo)-bálvalusain, Hyvinvointiala Hali ry:s sihke Suoma sosiála- ja dearvvašvuohta ry:s SOSTEs. Ovddasteaddjit ledje váldun sáhkasisdoaluid buvttadeaddjit dehe iežaset fáddásurggiid áššedovdit.
”Midjiide lea duođaid ávkkálaš oažžut dákkár máhtolaččaid joavkku birrasamet doarjut kontáktačuoggá doaimma”, kontáktačuoggá hoavda Marika Lahtivirta áhcagahttá.
Doaibmagoddi bargá buriid geavadiid juohkkin ja ovttasbargoforuman.
Kontáktačuoggá bálvalusaid ovdánahttin guhkit áigegaskka plána mielde
Rájiid rasttildeaddji dearvvašvuohtafuolahusa kontáktačuoggá bálvalusat ovdánahttojuvvojit duojásii áššehasaid váste. Jagi 2022 kontáktačuokkis gealai strategiijas. Strategiijabargu doalvvui maid miehtemielalaš imago ođasnuhttimii, ja kontáktačuokkis ovdánahtii ođđa imago jagi 2023. Seamma jagi álggahuvvui áššehasipmárdusbargu, mas čoggojuvvo diehtu sierra áššehasjoavkkuid dárbbuin kontáktačuoggá bálvalusaide ja dihtui rájiid rasttildeaddji dearvvašvuohtafuolahusas.
Giđđat 2024 kontáktačuokkis álggahii maid EU-dearvvasvuodadiksun.fi-fierbmebálvalusa viiddit teknihkalaš ovdánahttinbarggu.
”Doaibmagotti bargan lea joatkka dán ovdánahttimii. Dasa lassin, ahte doaibmagotti barggut vuođđuduvvet láhkii, de dat lea báitilis arena čanusjoavkobargui ja oktasaš dieđu juohkimii”, Lahtivirta dadjá.